Nýjar reglur um fjöldatakmörkum á sundstöðum tóku gildi í gær en í dag var ákveðið að loka sundstöðum á höfuðborgarsvæðinu frá morgundeginum.
Framkvæmdaráð almannavarna fundaði í dag með m.a. sóttvarnalækni sem þá vann enn að minnisblaði til ráðherra.
„Hann mæltist til þess að sundlaugum yrði lokað strax á morgun þótt aðrar reglur eða tilmæli væru ekki tilbúin. Það varð úr að sveitarfélögin sendu sameiginlega frá sér yfirlýsingu um lokun á morgun og urðu þar með við beiðni hans,” segir Rósa Guðbjartsdóttir, bæjarstjóri í Hafnarfirði í svari við fyrirspurn Fjarðarfrétta en þessi sameiginlega tilkynning var ekki send Fjarðarfréttum.
Uppfært kl. 20.24:
Eftir nokkra eftrirgrennslan fékkst tilkynning send frá aðstoðarmanni borgarstjórans í Reykjavík:
Sundlaugum á höfuðborgarsvæðinu verður lokað frá og með morgundeginum 7. október vegna hertra sóttvarnaraðgerða. Ákvörðunin er tekin sameiginlega af öllum sveitarfélögunum á höfuðborgarsvæðinu að höfðu samráði við sóttvarnarlækni og almannavarnir.
Tekið skal fram að öll 6 og 12 mánaða kort verða framlengd um þann tíma sem laugarnar eru lokaðar.
