Samninganefnd Sambands íslenskra sveitarfélaga hafnaði í dag miðlunartillögu ríkissáttasemjara í kjaradeilu við kennara.
Kennarar höfðu samþykkt tillöguna í gærkvöldi.
Magnús Þór Jónsson, formaður Kennarasambands Íslands, segir í viðtali við Mbl að uppsagnarákvæðið sem SÍS er sagt hafa hafnað nú einnig vera í tillögu tvö sem ríki og sveitarfélög samþykktu í janúar.
29. janúar sl. samþykkti bæjarstjórn Hafnarfjarðar eftirfarandi bókun:
„Bæjarstjórn Hafnarfjarðar harmar stöðu kjarasamningsviðræðna Sambands íslenskra sveitarfélaga og Kennarasambands Íslands. Skammt er síðan kennarar í leik- og grunnskólum á nokkrum stöðum á landinu, m.a. í einum grunnskóla í Hafnarfirði, fóru í tímabundin eða ótímabundin verkföll. Þann 29. nóvember sl. var skrifað undir samkomulag milli aðila þar sem verkföllum kennara á öllum skólastigum var frestað og samningsaðilar gáfu sér tvo mánuði til þess að ljúka kjarasamningum og samkomulagið gerði ráð fyrir friðarskyldu á þeim tíma. Nú er þessum tveimur mánuðum að ljúka og samningsaðilar hvattir til að leiða málið til lykta svo hægt sé að leggja nýjan kjarasamning til undirritunar sem fyrst.“
