Samkvæmt endurbættri skóglendisvefsjá sem Björn Traustason hjá Skógrækt ríkisins hefur gert er 24,8% Hafnarfjarðar, utan Krýsuvíkur skógi vaxinn. Í Hafnarfirði munar mestu um þekju náttúrulegs birkis undir 2 m á hæð.
Nágrannar okkar í Garðabæ hafa hæst hlutfall skóglendis af landi sínu eða 31,1% en á eftir okkur kemur skógræktarhéraðið Fljótsdalshreppur með 14,7%.
Í samantekt Péturs Halldórssonar á vef Skógræktar ríkisins kemur fram að hlutfall náttúrlegs birkis af flatarmáli sveitarfélags er mest í Garðabæ, rúm 23% og tæp 20% í Hafnarfirði. Alls eru 5 sveitarfélög með yfir 10% þekju birkiskóglendis neðan 400 m.
Skoða má vefsjána hér en þar er hægt að skoða hvern landshluta fyrir sig.
Aðeins 6 sveitarfélög með meiri en 5% þekju skógræktar
Íslendingar hafa undanfarna áratugi stefnt að því að þekja 5% láglendis skógi þótt hægar gangi en vonast var til í fyrstu. Ef reiknað er hlutfall ræktaðra skóga af flatarmáli lands neðan 400 m í einstökum landshlutum kemur í ljós að hlutfallið er hæst á Austurlandi. Þar reynast 2,3% lands neðan 400 m vera þakin ræktuðum skógum. Hlutfallið var mjög svipað á Vesturlandi og Suðurlandi, en lægst á Norðurlandi og Vestfjörðum.
Hlutfall ræktaðs skóg í landi Hafnarfjarðar undir 400 m er 5% en aðeins fimm sveitarfélög hafa hærra hlutfall ræktaðra skóga.
Hvað er skógur?
Samkvæmt alþjóðlegum skilgreiningum telst svæði vera skógur ef krónuþekjan er 10% með 500 plöntur á ha. eða meira. Þá er miðað við 5 m hæð trjáa en á Íslandi er miðað við 2 m hæð. Skógarsvæði með lægri en 2 m tré að jafnaði teljast kjarrsvæði.
Ýmsar fleiru skilgreiningar eru og telst skógrækt innanbæjar t.d. ekki með, jafnvel í stærri görðum ef undirgrróðurinn er sleginn. Ekki hefur verið tekið saman hversu mikil trjárækt er í Hafnarfirði og því engar tölur til um t.d. kolefnisjöfnun með trjárækt innanbæjar.
Hlutfall náttúrlegs birkis næst mest í Hafnarfirði
Hlutfall náttúrlegs birkis af flatarmáli sveitarfélags var mest í Garðabæ, 23,1% og 19,8% í Hafnarfirði. Alls voru 5 sveitarfélög með yfir 10% þekju birkiskóglendis neðan 400 m.
Sjá má ítarlegri umfjöllun á vef Skógræktar ríkisins hér.
