Hratt hefur gengið á Ratleikskortin og með sama framhaldi verða þau uppurin á allra næstu vikum. Því fer hver að verða síðastur að ná sér í eintak og hefja leit að einhverjum hinna 27 ratleiksmerkja sem búið er að koma fyrir víðs vegar um bæjarlandið.
Í ár er meginþemað landamerki og eyktamörk. Voru eyktamörk staðir sem miðað var við þegar horft var til sólu frá viðkomandi bæ. Hádegishóll, skammt aftan við slökkvistöðina er t.d. eyktarmörk frá Hraunsholti. Stuttur gangur er að sumum merkjanna og þau auðfundin en lengra er í önnur og það getur þurft nokkra útsjónarsemi til að finna aðra staði. Þá er mikilvægt að undirbúa sig vel, skoða kort vel og sjá hvaðan best er að koma að viðkomandi stað. Krossstapar sem eru á mörkum Hafnarfjarðar og Voga er t.d. best að koma að úr norðri, þá bera þeir betur við himin.
Góð þátttaka
Þátttaka undanfarin ár hefur verið mjög góð og flestir þeirra sem hafa skilað inn lausnum hafa farið á alla 27 staðina. Engin krafa er um að skila inn lausnum heldur er markmið leiksins að hvetja fólk til að ferðast um upplandið, njóta fjölbreyttrar náttúrufegurðar og að sjálfsögðu að njóta góðrar útiveru. Hins vegar er til mikils að vinna með því að skila inn því vinningar eru glæsilegir. Eru þrír heppnir þátttakendur dregnir út fyrir hvern flokk auk þess sem allir sem mæta á uppskeruhátíðina í haust eiga möguleika á útdráttarverðlaunum.
Léttfeti, Göngugarpur eða Þrautakóngur.
Flokkarnir eru Léttfeti, Göngugarpur og Þrautakóngur en til að teljast Léttfeti þarf að finna 9 staði, Göngugarpur verður fólk sem finnur 18 staði og Þrautakóngar eru þeir sem finna alla staðina. Á hverjum stað er ratleiksmerki, græn og hvít málmplata með lausnarorði sem skrifa þarf niður til að sanna að viðkomandi hafi komið á staðinn.
Stendur til 25. september
Leikurinn hófst í byrjun júní og stendur fram til 25. september en lausnum skal skila í þjónustuverið í Ráðhúsinu við Strandgötu. Fólk er að sjálfsögðu hvatt til að taka þátt og skila inn lausnum. Leikurinn er tilvalinn fyrir fjölskyldur, vinahópa og starfsmannahópa en að sjálfsögðu má fólk taka þátt í leiknum eitt með sjálfu sér og náttúrunni. Mikilvægt er að minna á að eins og í lífinu er endamarkið ekki aðalatriðið heldur leiðin að því en víða leynast gersemar sem vert er að horfa eftir á leið að ratleiksstöðunum. T.d. er tilvalið þegar búið er að finna merki nr. 27 á Hraun-krossstapa að ganga í 300 m til suðurs og finna þar magnað fyrirbrigði, Urðarás, þar sem hraunið hefur fallið niður á nokkrum kafla eftir að neðanjarðarhrauná, sennilegast úr Hrútagjárdyngju, hefur stíflast og glóandi hraunkvikan með þrýstingi sprengt sér leið upp með þeim afleiðingum að rásþakið hefur brotnað upp og síðan sigið niður aftur þegar glóandi hraunið flæddi undan.
Styrktaraðilar
Hönnunarhúsið ehf. gefur leikinn út fyrir Hafnarfjarðarbæ og auk bæjarsins styrkja ýmsir útgáfu Ratleiksins. Aðalstyrktaraðili í ár er VHE, Vélsmiðja Hjalta Einarssonar en auk þess styðja, Fjarðarpósturinn, Hress, Fjarðarkaup, Altis, Gámaþjónustan, Fjallakofinn, Fura, Gróðrastöðin Þöll, Músik og sport, Burgerinn, Hafís og Hafnarfjarðarhöfn leikinn.
Guðni Gíslason hefur lagt leikinn undanfarin níu ár með góðri aðstoð Ómars Smára Ármannssonar sem lagt hefur til fróðleikmola um staðina.
Kortin má fá í Fjarðarkaupum, í Ráðhúsinu, á Bókasafninu, á sundstöðum og víðar.
Sjá nánar um Ratleikinn á bloggsíðu leiksins og á Facebook
