Í ljósi athugasemda frá íbúum fellst umhverfis- og framkvæmdaráð ekki á framlagða tillögu um frisbígolfvöll í Áslandi og leggur til að aðrir staðir í bæjarlandinu verði skoðaðir í endurskoðun aðalskipulags Hafnarfjarðar sem nú stendur yfir.
Þetta kemur fram í fundargerð ráðsins frá fundi þess í morgun.
Frisbígolfélag Hafnarfjarðar hafði áður óskað eftir að gerður verði völlur við SV hluta Hvaleyrarvatns og í hlíðum Selhöfða en Skógræktarfélag Hafnarfjarðar lagðist hart gegn því vegna mögulegrar skemmda á trjám og var fallið frá því.
Þá var lögð fram tillaga í samráði við íþróttafulltrúa um völl í landi Áss, utan friðlands Ástjarnar, 18 holu keppnivöll sem í raun er ekkert frábrugðinn 18 holu velli, þar sem brautirnar áttu að liggja um skógarsvæði í landi Áss og undir hlíðum Ásfjalls. Var tekið fram að hanna ætti völlinn svo notkun hans myndi ekki trufla umferð gangandi og hjólandi á svæðinu.
Mótmæli
Íbúar í nágrenninu sættu sig margir ekki við völlinn og taldi að keppnisvöllur kallaði á umtalsverðar breytingar á svæðinu og hefði mikil áhrif á náttúruna í kring.
Einnig var bent á að á svæðinu væri engin salernisaðstaða og ekki gert ráð fyrir bílastæðum.
Í einni athugasemdinni var spurt hvað yrði um Hvítasunnuhlaup Hauka og áhyggjur voru hafðar af látum þegar spilað væri á sumarnóttum.
Hafðar voru áhyggjur af því að notkun frisbígolfvalla væri með öllu eftirlitslaus.
Fólki fannst vinnubrögð Hafnarfjarðarbæjar við kynningu og ákvörðun óásættanleg.
Fullyrt er að völlurinn yrði fyrst og fremst keppnisvöllur en ekki sem afþreying fyrir almenning.
Mótmæli og stuðningur
Þá er 7 síðna mótmælabréf skrifað af lögfræðingi fyrir íbúa Spóaáss en einn íbúi við Spóaáss sendi inn bréf þar sem hann væri ánægður og spenntur að sjá nýjan frisbígolfvöll og vonaðist að allt gengi hratt og vel fyrir sig.
Þá kom stuðningsbréf frá fjölskyldu við Lóuás.
Kynningarbréfið var ekki grenndarkynning í skilningi skipulagslaga og athugasemdum hefur ekki verið svarað eins og þarf að gera við grenndarkynningu. Því er ekki hægt að sjá nákvæmlega á hvaða forsendum umhverfis- og framkvæmdaráð tók sína ákvörðun.
Vonbrigði
Ágúst Fannar Ásgeirsson, formaður Frisbígolffélags Hafnarfjarðar var vonsvikinn með afgreiðslu umhverfis- og framkvæmdaráðs. Benti hann á að margar athugasemdir hafi komið við byggingu knatthúss við Ástjörn en ekki hafi verið tekið tillit til neinna þeirra. Þetta sé í annað sinn sem tillögum um völl væri hafnað þó vilji væri mikill hjá mörgum hjá Hafnarfjarðarbæ um að koma upp velli.
Sagði hann ekki koma fram hvaða athugasemda hefði verið tekið tillit til og sagði ekkert sérstakt við völlinn að hann væri keppnisvöllur, hægt væri að keppa á öllum frisbígolfvöllum á landinu. Stjórn félagsins kemur saman á mánudaginn og munu þá taka ákvörðun um næstu skref en Ágúst sagðist upplifa að það væri verið að hrekja þá úr bænum.
Undrast afgreiðslu Hafnarfjarðarbæjar
Frisbígolf hefur vaxið mikið á liðnum árum og eru nú 102 frisbígolfvellir um landið, þar af 10-11 einkavellir að sögn Birgis Þórs Ómarssonar, frumkvöðuls frisbígolfíþróttarinnar á Íslandi og formanns Frisbígolfsambandsins til 19 ára.
Af þessum völlum eru 8 átján holu vellir, þar af tveir í Reykjavík, 2 á Akureyri, á Reykjanesi, Selfossi og við Úlfljótsvatn.
Undrast hann afgreiðslu heilsubæjarins Hafnarfjarðar, að hafna velli við Hvaleyrarvatn og nú við Ástjörn. Segir hann frisbígolfvelli fyrst og fremst vera til að auka lýðheilsu og benti á að aðal keppnisvöllurinn á landinu, 18 holu völlur í Grafarholti, sé 98% notaður af fólki sem spilar frisbíolf sér til ánægju.
Sagði hann helming ungmenna á aldrinum 18-25 ára hafi spilað golf á síðasta ári samkvæmt Gallup könnun og það hljóti að vera mikið fagnaðarefni fyrir sveitarfélög að svo stór hluti ungmenna stundi holla útivist.
Aðspurður af hverju Frisbígolfsambandi væri ekki í ÍSÍ sagði hann að lítill áhugi hafi verið hjá ÍSÍ væri fyrir almenningsíþróttum, sem frisbígolf væri en það væri að breytast og ekkert ólíklegt að sambandið gangi inn í ÍSÍ á næstu árum.
Birgir kvaðst hafa komið að uppbyggingu á flestum völlum á landinu og af þeim væru ellefu á skógræktarsvæðum og alls staðar væri ánægja með þá. Sagði hann að ekki hafi einn einasti völlur verið aflagður. Benti hann á að á Klambratúni væri vinsæll völlur þar sem oft væri kastað yfir gönguleiðir en tryggt að sá sem kastaði hefði yfirsýn svo allir gætu nýtt svæðið í sátt og samlyndi.
Hann kvaðst mjög undrandi á afstöðu Skógræktarfélags Hafnarfjarðar sem vildi ekki frisbígolfvöll við Hvaleyrarvatn, í landi í eigu Hafnarfjarðarbæjar, sem félagið hafi ræktað skóg í. Þar hafi ekki staðið til að fella mörg tré enda vilji fólk spila í skógum. Hann sagði ekkert tré hafi drepist vegna þess að diskar hafi farið í þau en eitthvað af trjám hafi skemmst en það megi koma í veg fyrir með vörnum.
Ekki hafi staðið til að fella tré í landi Áss, nema kannski örfá, en aðallega hafi þurft að snyrta tré til að mynda leiðir í gegnum skóginn.
Undraðist hann að fallið hafi verið frá gerð vallarins án þess að tiltaka hvaða athugasemda hafi verið tekið tillit til. Brugðist hafi mátt vera við flestum ábendingum en hann sagðist skilja áhyggjur af bílastæðaskorti en það væri svo miklu víðar. Einnig sagðist hann skilja áhyggjur af hávaða ungmenna á björtustu sumarnóttunum en það væri ekki vandamál sem frisbígolfvöllur skapaði. Sagðist hann ekki hafa reynslu af því að sóðaskapur væri við frisbígolfvelli.
Lesa má athugasemdir við frisbígolfvöllinn hér. (Ath. 7 síðna athugasemd er tvítekin í skjalinu.)
