Úrskurðarnefnd umhverfis- og auðlindamála hefur í dag fellt úr gildi byggingarleyfi fyrir fjölbýlishúsaklasa með 23 íbúðum og einu atvinnurými á lóðinni Lækjargötu 2, þar sem Dvergshúsið svokallaða stóð.
Byggingarframkvæmdir eru þegar farnar af stað og er verið að slá upp fyrir kjallara.
Eigendur fasteigna að Lækjargötu 4, 6 og 8 og Brekkugötu 5, 7, 9, 10, 11, 16 og 18 kærðu þá ákvörðun byggingarfulltrúa Hafnarfjarðar frá 5. maí 2021 að heimila byggingu þessara fjölbýlishúsaklasa. Bentu kærendur á að teikningar sem liggi til grundvallar byggingarleyfinu væru ekki í samræmi við aðalskipulag Hafnarfjarðar. Að hafa meginhluta jarðhæða húsanna sem íbúðarhúsnæði væri í andstöðu við aðalskipulag bæjarins.
Málsrök Hafnarfjarðarkaupstaðar voru þau að aðeins hefði verið samþykkt á umræddum fundi, byggingaráform og töldu bæjaryfirvöld að kærendur hafi hvorki gert grein fyrir atvikum né málsástæðum og að ekki yrði annað séð en að kæran væri sett fram í þeim eina tilgangi að þrýsta á um endurskoðun á þeim byggingaráformum sem deiliskipulag lóðarinnar heimilaði.
Á þessi rök féllst kærunefndin ekki enda hafi byggingarleyfið verið gefið út í skjóli byggingaráforma sem hafi, að öðrum skilyrðum uppfylltum, þau réttaráhrif að hefja mætti samþykktar byggingarframkvæmdir.
Þá bendir kærunefndin á og tekur undir málsrök kærenda að fram komi í almennum ákvæðum aðalskipulags að á „miðsvæðum skal fyrst og fremst gera ráð fyrir verslunar- og þjónustustarfsemi og stjórnsýslu sem þjóna heilu landsvæði, bænum í heild sinni eða fleiri en einu bæjarhverfi, s.s. verslunum, skrifstofum, þjónustustofnunum, veitinga- og gisthúsum, menningarstofnunum og hreinlegum iðnaði. Þar sem aðstæður leyfa má gera ráð fyrir íbúðarhúsnæði, sérstaklega á efri hæðum bygginga.“
Þá bendir kærunefndin einnig á að í deiliskipulagsbreytingu sem gerð var á deiliskipulaginu Miðbær Hafnarfjörður, sem umrædd lóð er á, sé ekki fjallað um hvernig nýtingu jarðhæða sem snúa út að Suðurgötu og Brekkugötu skuli háttað en tekið fram að skilmálar Miðbæjarskipulagsins , sem öðlaðist gildi 2001 gildi að öðru leyti.
Ljóst er að byggingarfulltrúi samþykkti með hinni kærðu ákvörðun byggingarleyfi fyrir fjölbýlishúsaklasa með íbúðum á jarðhæð.
Því felldi úrskurðarnefndin í gær úr gildi þá ákvörðun byggingarfulltrúa Hafnarfjarðar frá 5. maí 2021 um að samþykkja byggingarleyfi fyrir byggingu fjölbýlishúsaklasa á lóðinni Lækjargötu 2.
Úrskurðinn má lesa hér.
Hvað næst?
Ef horft er til annarra mála sem Hafnarfjarðarbær hefur verið gerður afturreka með má búast við að ráðist verði í breytingu á deiliskipulagi lóðarinnar sem í raun ætti að kalla á breytingu á aðalskipulag, allt til að komast hjá að uppfylla ákvæði eigin skipulags.
Nágrannar kæra nýsamþykktar teikningar að húsum á Dvergsreitnum
