Lögregla og slökkvilið var við ísbúðina Hafís á Bæjarhrauni á níunda tímanum í morgun en borist hafði tilkynning um að vatn flæddi um búðina. Enginn var inni og reyndu menn ýmsar leiðir til að komast inn áður en eigandinn mætti á staðinn.
Flæddi kalt vatn um búðina eftir að vatnslögn gaf sig og var mikið vatn á gólfum en ekkert niðurfall er í húsnæðinu. Aðstoðuðu starfsmenn lögreglu og slökkviliðs við að skafa vatnið út en ekki virtust miklar skemmdir vera í húsnæðinu en það á betur eftir að koma í ljós þegar allt verður þurrkað upp.
