Hátt í fjörutíu einstaklingar frá tuttugu skólum sátu Build-kynningarfund um nýtt námsefni sem haldið var hjá Hafnarfjarðarbæ á dögunum. Píeta samtökin standa að verkefninu með mennta- og lýðheilsusvið Hafnarfjarðar sem sinn bakhjarl.
Build er 6 vikna forvarnanámskeið hannað af sálfræðingum út frá samtali við ungmenni til að efla þau í erfiðum aðstæðum, kenna þeim þrautseigju og seiglu og gefa bjargráð.
Kennt í samstarfi við Píeta
Ellen Calmon, framkvæmdastýra Píeta samtakanna, segir verkefnið lífsnauðsynlegt: „Þetta er gríðarlega þarft verkefni og markmið Píeta samtakanna að lágmarka fjölda skjólstæðinga í framtíðinni með því að standa að kenna ungmennunum bjargráðin,“ segir hún.
„Við erum einstaklega þakklát Hafnarfjarðarbæ fyrir að taka þessu verkefni svona vel. Fagfólk bæjarins hefur lagt heilmikið að mörkum að þróa kennsluefnið. Þetta hefur verið einstakt samband og bærinn tekið þetta verkefni upp á sína arma,“ segir Ellen.
Build áhrifaríkt námskeið
Stella B. Kristinsdóttir, fagstjóri forvarna- og frístundastarfs hjá Hafnarfjarðarbæ, segir námskeiðið hafa verið kennt síðustu ár í skólum Hafnarfjarðarbæjar. Kennsluleiðbeiningar ásamt verkefnabók til að styðja við námsefnið hafi nú verið uppfært.
„Við fengum eldri þjálfara úr Build-samfélaginu og nýja saman og fórum yfir nýja námsefnið sem dýpkar viðfangsefið enn frekar,“ segir Stella.
„Við höfum í höndunum enn áhrifaríkara 6 vikna forvarnarnám fyrir 8. bekkinga eftir að hafa þróað námsefnið enn frekar,“ segir hún. „Fjöldi skóla tekur árlega þátt og við höldum alltaf þjálfaranámskeið sem þetta til að þjálfa fólk í að kenna efnið.
Ræða um stóru málin
Stella segir sýnt að Build auki þrautsegju og seiglu. „Grunnur námskeiðsins er að ræða við ungt fólk um mikilvæg málefni í þeirra lífi, eins og um fjölskyldu, vini, einelti og kenna þeim að átta sig á hvenær eitthvað í umhverfi þeirra er vandamál. Þannig geta þau betur metið hvenær þau þurfa að leita sér hjálpar. Þau sitja þá ekki of lengi með það sem þeim líður illa með heldur fá hjálp,“ segir Stella.
Ellen segir ljóst að þessi mikilvæga forvörn hefði ekki dafnað eins og hún hefur gert, eða verið hægt að bjóða öðrum sveitarfélögum að taka þátt, nema fyrir fagfólkið í Hafnarfjarðarbæ. „Við erum sjúklega ánægð með samstarfið.“
Næsta þjálfaranámskeið í nóvember
Stella segir hátt í 25 nú hafa þjálfararéttindi og að næsta þjálfaranámskeið verða í nóvember. Þá hefjist námskeiðin fyrir börnin á vorönn.
„Við bjóðum öllum skólum að taka þátt og hvetjum þá til þess að gefa krökkunum sínum tækifæri til að öðlast þá færni sem Build kennir.“
Heimild: Hafnarfjarðarbær
