Hafnfirðingar tóku vel við sér er Nettó opnaði nýja verslun við Miðvang kl. 12 á hádegi í dag. Fólk beið í hópum fyrir utan á meðan bæjarstjóri klippti á borði og opnaði verslunina formlega. Þarna hefur verið matvöruverslun síðan á áttunda áratugi síðustu aldar er Kaupfélag Hafnarfjarðar opnaði þarna stóra og glæsilega verslun. Síðan þá hafa verslanir verið reknar undir merkjum Kaupfélaganna og síðan 1993 undir merkjum Samkaupa sem er í eigu Kaupfélaga víða um land og eins lífeyrissjóðs.
![Langar biðraðir mynduðust](https://www.fjardarfrettir.is/wp-content/uploads/2016/09/Netto_opnar-07-1024x611.jpg)
47 verslanir
Að sögn Ómars Valdimarssonar framkvæmdastjóra Samkaupa var þarna verið að svara kalli markaðarins og auka vöruúrval í matvörum og lækka um leið verðið. Miklar breytingar hafa verið gerðar á versluninni og að því komu fjölmargir verslunarstjórar úr Samkaup/Nettó verslunum víða um land. Ómar segir verslanir Samkaupa í allt 47 og um 75% þeirra úti á landi. Þær eru af misjöfnum stærðum og aðlagaðar staðháttum á hverjum stað. Nýja verslunin í Hafnarfirði er með vöruúrval eins og það gerist best í Nettóverslununum og fagnaði Ómar góðum viðtökum við opnuninni en gert er ráð fyrir töluverðri fjölgun viðskiptavina við þessar breytingar.
![Ómar Valdimarsson framkvæmdastjóri Samkaupa, Jónatan Eggertsson verslunarstjóri og Gunnar Egill Sigurðsson forstöðumaður verslurnarsviðs.](https://www.fjardarfrettir.is/wp-content/uploads/2016/09/Netto_opnar-03-1024x612.jpg)
Hallur Geir Heiðarsson rekstrarstjóri Nettóverslananna segir áherslur verið lagðar á gott úrval af grænmeti og ávöxtum, nýbakað brauðmeti, heilsuvörur og lífrænt ræktaðar vörur. Stórir hringir í loftum afmarka þessa áherslu og yfir grænmetinu eru rakatæki sem tryggja sem hagkvæmasta rakastig í grænmetis- og ávaxtadeildinni.
![netto_opnar-02](https://www.fjardarfrettir.is/wp-content/uploads/2016/09/Netto_opnar-02-1024x612.jpg)
Í eigu viðskiptavinanna
Samkaup er í samstarfi við samtök Coop verslana sem tryggir þeim aðgang að góðum vörum á hagstæðu verði. Áhersla er lögð á góða þjónustu og lágt verð til viðskiptavina og enda eru eigendur í raun viðskiptavinirnir í gegnum Kaupfélögin. Kaupfélag Hafnfirðinga fór í þrot á sínum tíma og KRON einnig en til er Hafnarfjarðardeild Kaupfélags Suðurnesja sem nær nú orðið í raun yfir allt höfuðborgarsvæðið. Hver sem er getur gerst félagi og notið 2% afsláttar þegar verslað er í verslunum Samkaupa eða Nettó.
![Glæsileg grænmetis- og ávaxtadeildin](https://www.fjardarfrettir.is/wp-content/uploads/2016/09/Netto_opnar-08-1024x683.jpg)
Langar biðraðir
Örtröð var í versluninni eftir að hún var opnuð fólk kepptist við að nýta þau góðu tilboð sem voru í tilefni opnunarinnar. Lambakjöti í tonnatali seldist strax á fyrstu klukkutímunum og kerrur voru troðfullar af tilboðsvörum. Við fyrstu sýn hefði mátt halda að Kötlugos væri yfirvofandi með tilheyrandi skakkaföllum og fólk væri að byrgja sig upp.
![Mikil áhersla er lögð á heilsuvörur](https://www.fjardarfrettir.is/wp-content/uploads/2016/09/Netto_opnar-04-1024x683.jpg)
Jónatan Eggertsson verslunarstjóri og starfsfólk hans hafði í nógu að snúast við að aðstoða fólk, bæta í hillur og bjóða upp á kaffi og kökur í tilefni opnunarinnar.
![Starfsfólk á kassa fékk litla hvíld](https://www.fjardarfrettir.is/wp-content/uploads/2016/09/Netto_opnar-09-1024x683.jpg)
![Boðið var upp á kaffi og köku við komuna inn í verslunina](https://www.fjardarfrettir.is/wp-content/uploads/2016/09/Nettó-opnar-01-1024x683.jpg)