Umhverfis- og framkvæmdaráð hefur óskað eftir því við Stætó bs. að pöntunarþjónusta í iðnaðarhverfinu í Hellnahrauni verði í boði frá 1. janúar 2022.
Á svæðinu er ýmis atvinnu- og iðnaðarstarfsemi sem dreifist yfir nokkuð stórt svæði. Í dag ekur leið 1 eftir Drekavöllum og Kirkjuvöllum og eru stöðvarnar á leið 1 innan göngufjarlægðar frá þeim hluta iðnaðarhverfisins sem er næst íbúahverfinu, þ.e. Norðurhellu, Suðurhellu, Selhellu og Miðhellu. Hins vegar eru aðrir hlutar iðnaðarhverfisins utan göngufjarlægðar frá leið 1.
Í minnisblaði Strætó um pöntunarþjónustu sem lagt var fyrir á fundi ráðsins í dag þar sem fram kemur að í framhaldi af óskum um bætta þjónustu almenningssamgangna á svæðinu, var skoðaður sá valmöguleiki að koma á fót pöntunarþjónustu með leigubíl milli iðnaðarhverfisins og Ásvallalaugar.
Pöntunarþjónustan myndi virka þannig að farþegar geti pantað ferð til og frá ákveðnum stöðum innan hverfisins til og frá Ásvallalaug. Einungis yrði stöðvað í iðnaðarhverfinu og við Ásvallalaug, en ekki á þeim stöðvum sem eru þar á milli.
Leigubílar frá Hreyfli myndu sinna pöntunarþjónustunni og það þyrfti að panta ferð hjá Hreyfli með a.m.k. hálftíma fyrirvara. Leigubíllinn færi þá einungis á þær stöðvar sem pantað var til eða frá í hvert skipti. Ef margir farþegar panta sömu ferð þá gæti þurft að senda fleiri en einn leigubíl fyrir sömu brottför. Verðin sem gefin eru upp hér fyrir neðan eiga við um hvern leigubíl sem er pantaður og því gæti þurft að greiða það verð fyrir fleiri en einn leigubíl í sömu ferð ef margir panta á sama tíma.
Í kostnaðarútreikningunum er gert ráð fyrir að boðið verði upp á fimm ferðir á hálftíma fresti í hvora átt á annatíma að morgni virka daga og 7 ferðir á hálftíma fresti á annatíma seinnipartinn virka daga. Þessu er þó hægt að breyta eftir óskum Hafnarfjarðar.
Kostnaður á hverja pantaða ferð (hvern leigubíl) er áætlaður u.þ.b. 3.300 kr. Ef miðað er við að ferðir séu í boði einungis á annatíma á hálftíma fresti eins og lagt var til hér að framan og allar ferðir yrðu nýttar með einungis einum leigubíl þá yrði árlegur kostnaður vegna pöntunarþjónustunnar u.þ.b. 20,6 m.kr. á ári. Ef hins vegar einungis helmingur ferða eru pantaðar með einum leigubíl þá yrði kostnaðurinn u.þ.b. 10,3 m.kr. á ári. Ekki er hægt að áætla á þessu stigi hversu margar ferðir verða pantaðar.
Akstursleið til og frá Ásvallalaug
Leiðir 1 og 19 stoppa báðar í dag við Ásvallalaug og því munu farþegar sem nýta sér pöntunarþjónustuna geta skipt yfir í þær leiðir við Ásvallalaug.
