Umhverfis- og framkvæmdaráð samþykkti á fundi sínum í morgun að fela umhverfis- og skipulagssviði að fá óháðan ráðgjafa til að vinna tillögur að bættu og öruggara umferðarflæði við hringtorgið við Lækjargötu til bráðabirgða eða þar til varanleg lausn á kaflanum frá Lækjargötu að Álftanesvegi verður að veruleika.
Í bókun ráðsins kemur fram að umhverfis- og framkvæmdaráð Hafnarfjarðarkaupstaðar, leggi áherslu á að framkvæmdaáætlun samgöngusáttmálans standist enda brýnt að leyst verði úr fyrrgreindum umferðarvanda við Reykjanesbrautina sem vald óheyrilegum umferðartöfum og slítur íbúðahverfi bæjarins í sundur.
Gríðarlegar umferðartafir myndast oft á Reykjanesbraut í brekkunni frá kirkjugarðinum og að hringtorginu við Lækjartorgi. Hin mikla umferð er einnig þess valdandi að íbúar í Setbergi eiga erfitt með að komast í önnur hverfi bæjarins.
Vandamálið endar reyndar ekki við hringtorgið því miklar umferðartafir eru einnig frá torginu og að gatnamótunum við Kaplakrika.
![](https://www.fjardarfrettir.is/wp-content/uploads/Reykjanesbraut-Laekjargata-03-1024x545.avif)
20 milljarðar til verksins skv. samgöngusáttmála
Fagnaði ráðið jafnframt uppfærðum og raunhæfum samgöngusáttmála höfuðborgarsvæðisins. Í honum er áætlað að um 20 milljarðar verði settir í bráðnauðsynlegar úrbætur á kaflanum frá hringtorginu við Lækjargötu norður fyrir Kaplakrika að Álftanesvegi (við Góu).
Reykjanesbraut í stokk eða í göng undir Setbergshamarinn
Umhverfis- og framkvæmdaráð leggur áherslu á að greining á kostum þess að setja hluta Reykjanesbrautar í stokk eða göng undir Setbergshamarinn verði tilbúin sem fyrst. Segir í bókun ráðsins að samhliða úrbótum í stofnvegum verði að koma fram raunhæfar tillögur um almenningssamgöngur til og frá Hafnarfirði enda skilvirkar almenningssamgöngur besta leiðin til umhverfisvænna samgangna.