Sigurður Þ. Ragnarsson fulltrúi Miðflokksins í bæjarstjórn Hafnarfjarðar lagði til á bæjarstjórnarfundi í dag að Hafnarfjarðarbær hafi frumkvæði að því að leita til eigenda einkarekinna heilsugæslustöðva með það að markmiði að komið verði á fót slíkri heilsugæslustöð í bænum.
Segir hann biðtíma eftir tíma hjá heilsugæslulækni í Hafnarfirði vera alltof langan. „Biðtími á einkareknum heilsugæslustöðvum er mun styttri og boðleiðir markvissari. Vera kann að bærinn þurfi að liðka fyrir slíku með öflun húsnæðis eða afsláttar af fasteignaskatti til að byrja með. Raunveruleikinn er sá að fjölmargir Hafnfirðingar leita nú eftir heilsugæsluþjónustu utan sveitarfélagsins,“ segir í greinargerð með tillögunni og var henni vísað til bæjarráðs til efnislegrar umræðu.
Vilja merkja bæjarhluta með sögulegri fræðslu
Miðflokkurinn lagði til að farið verði í átak í að merkja bæjarhluta með sögulegri fræðslu um tilurð hvers svæðis.
Segir í greinargerð að um sé að ræða svipaða útfærslu og fólk fær nú á strandstígnum. Er lagt til að einstakir bæjarhlutar t.d. Vellirnir og Norðurbærinn fái tvö slík skilti hvort hverfi við fjölfarna göngustíga. Lagt er til að útbúin verði 8 slík skilti. Heildarkostnaður yrði því 2,4 milljónir króna. Var málinu vísað til umhverfis- og framkvæmdaráðs til útfærslu og ákvörðunar.
Hreinsun gatna til að draga úr svifryki
Miðflokkurinn lagði til að veitt sé 10 milljónum króna til hreinsunar gatna til að draga úr svifryki í andrúmslofti að vetrarlagi í bænum.
„Einn mesti orsakavaldur svifriks er slit sem bílar valda á gatnakerfinu ekki síst bílar á nagladekkjum. Á köldum dögum og þegar vindur er hægur mælist styrkur svifryks of oft yfir heilsuverndarmörkum. Við því verður að bregðast. Með átaki við þrif gatna með sérhæfðum götuþvottasóparabílum má draga verulega úr svifryki í andrúmslofti og fækka dögum þar sem svifryk fer yfir heilsuverndarmörk, íbúum til heilla.“ segir í greinargerð með tillögunni. Var málinu vísað til umhverfis og framkvæmdaráðs til ákvörðunar.
Fjármagn verði sett í að tryggja móðurmálskennslu fólks af erlendum uppruna
Miðflokkurinn lagðí einnig til að sett verði fjármagn til að koma á fót kennslu fyrir fólk af erlendum uppruna þar sem börnum verður tryggð kennsla i sínu móðurmáli og þeim gert kleift að viðhalda menningu síns upprunalands og færni í tungumálinu. Fullorðnum verði veitt íslenskukennsla á mismundandi þyngdarstigum og námskeið í menningu og sögu íslendinga.
Málinu var vísað til fræðsluráðs til efnislegrar meðferðar.
Fé til að efla snjallvæðingu eldri borgara
Þá lagði Miðflokkurinntil að sett verði eyrnamerkt fjárhæð til að efla kennslu eldriborgara í snjallvæðingu með snjalltölvum. Slíkt vinni gegn félagslegri einangrun eldri borgara og geti í mörgum tilvikum aukið lífsgleði þeirra.
Málinu var vísað til fjölskylduráðs til afgreiðslu.
