Það mátti búast við hörkuleik í undanúrslitum bikarkeppni kvenna í knattspyrnu í kvöld þegar nýliðar FH í bestu deild og topplið 1. deildar, Víkingur Reykjavík, mættust.
Lið FH hefur komið mjög á óvart í sumar og er í 3. sæti bestu deildar og lið Víkings hefur örugga forystu í 1. deildinni.
Eftir markalausan fyrri hálfleik þar sem FH-ingar höfðu verið mun sterkari kom það eins og köld gusa þegar hin 16 ára Sigdís Eva Bárðardóttir skoraði fyrir Víking eftir varnarmistök hjá FH.
En fljótlega fékk FH vítaspyrnu sem Hildigunnur Ýr Benediktsdóttir skoraði úr af miklu öryggi.
Reyndar vildu margir að FH fengi aðra vítaspyrnu stuttu síðar er boltinn virtist fara í hönd leikmanns Víkings inni í teig en ekkert var dæmt.
FH sótti stíft en það voru Víkingsstúlkur sem bættu við marki á 84. mínútu er Sigdís Eva skoraði sitt annað mark. Gríðarlegur fögnuður braust út í herbúðum Víkings bæði innan vallar og ekki síst á áhorfendapöllunum.
Þrátt fyrir mikla baráttu tókst FH-ingum ekki að jafna og bikardraumurinn var úti.
