Gleðin var mikil í herbúðum karlaliðs FH í handbolta á laugardaginn er liðið hampaði bikarmeistaratitli í handbolta í fyrsta sinn í aldarfjórðung.
FH- liðið sem ekki var búist við svo miklu af í upphafi leiktíðar hefur heldur betur sýnt að það kemur maður í manns stað. Liðið missti marga lykilleikmenn sem héldu til útlanda að leika í atvinnumennsku en liðið hefur staðið sig vel í úrvalsdeildinni og eru þar í toppbaráttunni ásamt Haukum, Val og Selfossi.
FH sló Víking út með 9 marka sigri í 16 liða úrslitum, sigraði Aftureldingu með 3ja marka mun, en Afturelding hafði slegið Hauka út og FH sigraði svo ÍR í undanúrslitum á föstudaginn 25-24 en sigur FH var þó öruggari en tölurnar sýndu.
Valur sem hafði slegið 1. deildar lið Fjölnis út í framlengdum leik eftir umdeilt vítakast á lokasekúndunni var svo mótherji FH-inga í úrslitum á laugardag í Laugardalshöllinni. FH skoraði fyrsta markið og lét forystuna aldrei af hendi og sigraði örugglega 27-24. Gleðin var ósvikin enda hafði enginn leikmanna liðsins hampað bikarnum fyrr og bikarinn var svo fluttur í Fjörðinn og var fagnað vel og lengi í Kaplakrika.
Ásbjörn Friðriksson, fyrirliði, stjórnaði liði sínum af miklu öryggi og var jafnframt markahæstur með 7 mörk, Arnar Freyr Ársælsson skoraði 6 mörk og varnarjaxlinn og línumaðurinn Ágúst Birgisson skoraði 5 mörk. Birgir Fannar Bragason stóð sig mjög vel í marki FH og varði 15 skot.
