FH og Haukar mættust í Kaplakrika í Hafnarfjarðarslaginum í úrvalsdeild karla í handbolta í kvöld. Ávallt er mikið í húfi þegar liðin mætast, ekki síst í síðasta leik fyrir jól.
Fyrri hálfleikur var mjög jafn en FH-ingar voru nær alltaf einu til tveimur mörkum á undan Haukunum sem fylgdu fast eftir. Staðan í hálfleik var 14-14.
Leikmenn Hauka komu ákveðnir úr búningsklefunum og náðu sex marki forskoti þegar tíu mínútur voru liðnar af seinni hálfleik í stöðunni 16-22. Þá kom ævintýranlegur kafli hjá FH eftir að Ágúst Birgisson náði að brjóta ísinn fyrir FH-inga sem skoruðu næstu sjö mörk leiksins og komust einu marki yfir 23-22. Fylgismenn FH-inga voru heldur betur með á nótunum og hvöttu sína menn á meðan aðeins dofnaði yfir stuðningsmönnum Hauka.
Þá tók við gríðarlega jafn og spennandi leikhluti þar sem FH var þó ávallt skrefinu á undan. Komust þeir í tveggja marka forskot þegar þrjár mínútur voru eftir, 29-27 en Haukar náðu að jafna í 29-29 og allt var á suðupunkti. FH-ingar fengu tæpa hálfa mínútu til að jafna og allt leit út fyrir jafntefli þegar Björgvin Páll Gústavsson, markmaður Hauka varði á síðustu ekúndunum frá Einar Rafni Eiðssyni en boltinn féll út til Óðins Þórs Ríkharðssonar sem skoraði sigurmarkið bókstaflega á síðustu sekúndunni.
FH-ingar fengu að hvíla í samtals 12 mínútur og fékk Ísak Rafnsson rautt spjald undir lok leiksins. Haukar fengu aðeins tvær brottvísanir, samtals 4 mínútur.
FH vann líka fyrri leik liðanna á Ásvöllum með fjórum mörkum, 27-23.
Leikurinn í kvöld var jafnframt seinasti leikur liðanna á þessu ári og því geta FH-ingar talað um hvít jól eða svart-hvít jól.
Mörk FH skorðu:
Ásbjörn Friðriksson, 9 / 2
Einar Rafn Eiðsson, 5
Gísli Þorgeir Kristjánsson, 4
Ágúst Birgisson, 3
Óðinn Þór Ríkharðsson, 3
Jóhann Karl Reynisson, 2
Ísak Rafnsson, 2
Jóhann Birgir Ingvarsson, 1
Jakob Martin Ásgeirsson, 1
Ágúst Elí Björgvinsson varði 17 skot í marki FH.
Mörk Hauka skoruðu:
Hákon Daði Styrmisson, 7 / 3
Atli Már Báruson, 6
Daníel Þór Ingason, 6
Adam Haukur Baumruk, 3
Leonharð Þorgeir Harðarson, 3
Heimir Óli Heimisson, 2
Jón Þorbjörn Jóhannsson,1
Björgvin Páll Gústavsson, 1
Björgvin Páll Gústavsson varði 18 skot í marki Hauka
