FH tekur á móti Tatran Prešov í þriðju umferð bikarkeppni Evrópu karla í handbolta á laugardaginn í Kaplakrika kl. 14.
Það er mikið í húfi fyrir FH-liðið. Fyrri leikur liðanna var í Slóvakíu á laugardaginn þar sem Tatran Prešov sigraði með 3 mörkum, 24-21 eftir að jafnt hafði verið í hálfleik 11-11 og jafnt var í stöðunni 20-20. FH þarf því að sigra með helst 4 mörkum til að komast áfram í riðlakeppnina en ekkert íslenskt lið hefur komist svo langt.
Meðal liða sem eru komin áfram í riðlakeppnina eru SC Magdeburg, Füchse Berlin, Ligi HF og franska liðið Saint Raphael sem bæði FH og Haukar hafa att kappi við en tapað.
Halldór Jóhann Sigfússon, þjálfari FH-inga sagðist í samtali við Fjarðarfréttir hafa verið ánægður með sína menn í Slóvakíu. Þeir hafi spilað mjög öfluga vörn og staðið sig gríðarlega vel gegn miklu mótlæti og segir vel hægt að fullyrða að liðið hafi orðið af 2-3 mörkum.
Hvað er í húfi?
„Það er mikið í húfi, sæti í þessari riðlakeppni sem ekkert íslenskt lið hefur áður komist í. Keppnin er reyndar frekar nýtilkomin en í henni eru gríðarsterk lið og í raun 16 liða úrslitakeppni.
Halldór segir leikinn leggjast mjög vel í sig og telur liðið eiga góða möguleika á sigri á heimavelli með góðum stuðningi Hafnfirðinga. Segir hann mjög gaman að fá að leika á móti svona sterku liði og skorar hann á Hafnfirðinga að fjölmenna í Kaplakrika kl. 14 á laugardaginn. Segist hann vonast eftir álíka stemmningu og í úrslitakeppni. Segir hann kjörið tækifæri að koma í Kaplakrika og bregða sér svo aftur í miðbæinn til að kaupa jólagjafirnar.
Sigri FH í einvíginu við Tatran Prešov kemst liðið í riðlakeppni þar sem keppt verður í fjórum riðlum. Þá má búast við stuðningi frá EHF og fjárhagslegur róður verði mun léttari en fyrr.
