Hafnfirska sundkonan Hrafnhildur Lúthersdóttir úr Sundfélagi Hafnarfjarðar sló heldur betur í gegn á Evrópumeistaramótinu í sundi í 50 m laug í London. Varð hún fyrst Íslendinga til að komast á pall á Evrópumeistaramóti í 50 m laug og endurtók svo leikinn tvisvar.
Fyrst náði hún silfurverðlaunum í 100 m bringusund þar sem hún sótti stíft á heimsmethafann í lokin og kom í mark á nýju Íslandsmeti 1,06.45 mín.
Þá náði hún bronsi í 200 m bringusundi, einnig á nýju Íslandsmeti 2,22.96 mín.
Hún toppaði svo árangur sinn með silfri í 50 m bringusundi á 30,91 sek. en hún hafði bætt Íslandsmetið í undanúrslitum.
Vel var tekið á móti Hrafnhildi í Ásvallalaug þegar hún kom til landsins og sem viðurkenningu fyrir þennan frábæra árangur og til að styðja við Hrafnhildi í undirbúningi hennar fyrir Ólympíuleikanna ákvað Hafnarfjarðarbær að veita Hrafnhildi 750.000 kr. afreksmannastyrk.
.
