Hrafnhildur Lúthersdóttir, sundkona úr SH, synti í dag í undanrásum í 100 m bringusundi á Ólympíuleikunum í Brasilíu. Hún varð 4. í sínum riðli, synti á 1:06:81 mín. en Íslandsmet hennar er 1:06.45 mín.
Hún var með 9. besta tímann af þeim 16 sem komust áfram svo árangur hennar lofar góðu fyrir undanúrslitin sem synt verða í nótt og hennar riðill hefst kl. 01:37. Átta bestu í undanúrslitunum keppa svo til úrslita.
Hrafnhildur syndir á 2. braut og er bein útsending á RÚV.
Klaus Jürgen Ohk, þjálfari hennar, segir þau vera mjög ánægð með árangurinn. Hrafnhildur hvíldi sig í um 10 mínútur í ísbaði til að ná sér í besta form fyrir undanúrslitasundið.
Klaus þakkaði sérstaklega fyrir hvatninguna af Thorsplani og stuðning Hafnfirðinga.
