Hafnfirðingurinn Anton Sveinn Mckee úr SH gerði sér lítið fyrir og bætti Íslandsmetið sitt í 50 metra bringusundi enn og aftur í gær í úrslitariðlinum á Evrópumeistaramótinu í sundi í 25 m laug sem haldið er í Glasgow í Skotlandi. Hann endaði 7. í greininni. En með sundinu jafnaði hann jafnframt Norðurlandamet Tobiasar B. Bjerg frá Danmörku sem synti fyrr um daginn í undanrásum á sama tíma og Anton Sveinn í úrslitasundinu eða 26,14 sekúndum.
Anton hóf daginn með því að bæta met sem hann setti HM25 í Hangzhou í fyrra en það var 26,74 sekúndur, en metið í gærmorgun var 26,43. Í milliriðlum í fyrstu grein úrslitahlutans bætti hann Íslandsmetið aftur og synti þá á 26,28. Hann var mjög ánægður eftir það sund, það geislaði af honum öryggið og hann nýtti það svo sannarlega þegar hann synti greinina í þriðja skipti í dag og bætti metið sitt enn og aftur og jafnaði Norðurlandametið eins og áður sagði.
Fjórða Íslandsmet hans í morgun
Í morgun keppti Anton Sveinn í 200 m bringusundi og varð annar í sínum riðli og með fjórða besta tíma allra, 2:03,67 mínútur og bætti því Íslandsmet sitt um 0,76 sekúndur.
Hann hefur því sett Íslandsmet í hvert sinn sem hann hefur stungið sér til sunds á Evrópumeistaramótinu, þrisvar í 50 m bringusundi og nú í 200 m bringusundi. Aldeilis glæsilegur árangur hjá Antoni Sveini.
Bein útsending frá úrslitasundinu
Anton Sveinn keppir í úrslitum kl. 17.15 í dag og verður sýnt beint frá úrslitum á RÚV2 og hefst útsending kl. 16.55.
Hann mun svo keppa í 100 metra bringusundi í fyrramálið.
