Vel heppnuðu Aldursflokkameistaramóti Íslands (AMÍ) í sundi lauk í Ásvallalaug í gær.
Sundfélag Hafnarfjarðar stóð uppi sem sigurvegari í stigakeppni félaga og varð lokastigastaðan svona:
SH – 1.008 stig
ÍRB – 811
Breiðablik – 570
ÍBR – 421
Ægir – 201
Sundfélag Akraness – 162
Óðinn – 175
UMFA – 50
UMFB – 28
Stjarnan – 25
Sundfélag ÍBV – 9
Sundfélagið Rán – 2
UMF Selfoss – 1
Fjörður og Hamar voru án stiga og þá kepptu erlendu félögin KBSS og Capitol Sea Devils sem ekki tóku þátt í stigakeppni félaganna.
UMF Bolungarvíkur hlaut verðlaun sem prúðasta liðið og var að sjálfsögðu vel að því komið.
Eitt piltamet á dag
Eitt piltamet féll á föstudag er Daði Björnsson úr SH synti 100 m bringusund á 1:02,75 mín. Gamla metið var 1:02,99 í eigu Guðna Emilssonar frá árinu 2006.
Eitt piltamet féll á laugardag er piltasveit SH, þeir Veigar Hrafn Sigþórsson, Snorri Dagur Einarsson, Símon Elías Statkevicius og Daði Björnsson, bættu piltametið um tæpar fjórar sekúndur, syntu á 3:57:75 mínútum en gamla metið átti piltasveit Sf Ægis sem þeir settu árið 1999.
Eitt drengjamet var sett á lokadeginum í 100 m flugsundi en þar synti Birnir Freyr Hálfdánarson úr SH á 58,05 sek en gamla metið var 1:00,10 sem var sett á AMÍ í Hafnarfirði fyrir 10 árum síðan.
Aldursflokkaverðlaun
Aldursflokkaverðlaun einstaklinga eru veitt þeim keppendum sem ná bestum samanlögðum árangri í sínum stigahæstu greinum í samræmi við stigatöflu FINA. Í flokki sveina og meyja (12 ára og yngri) er reiknaður árangur úr 200 metra fjórsundi, 400 metra skriðsundi og svo stigahæstu grein þar fyrir utan.
Sveinameistari AMÍ 2020 er Denas Kazulis úr Íþróttabandalagi Reykjanesbæjar, en hann hlaut 1076 stig samtals fyrir 200 m fjórsund, 400 m og 800 m skriðsund.
Meyjameistari AMÍ 2020 er Ylfa Lind Kristmannsdóttir úr Íþróttabandalagi Reykjavíkur, en hún hlaut 1279 stig samtals fyrir 200 m fjórsund, 400 m og 200 m skriðsund.
Í flokki drengja og telpna (13-14 ára) er reiknaður árangur úr þremur stigahæstu greinum einstaklingsins.
Drengjameistari AMÍ 2020 er Birnir Freyr Hálfdánarson úr Sundfélagi Hafnarfjarðar, en hann hlaut 1727 stig samtals fyrir 200 m og 800 m skriðsund og 100 m flugsund.
Telpnameistari AMÍ 2020 er Freyja Birkisdóttir úr Breiðablik, en hún hlaut 1862 stig samtals fyrir 200 m, 400 m og 800 m skriðsund. Freyja fékk einnig afhentan Ólafsbikarinn en hann er veittur þeim einstaklingi sem bestum árangri nær í 400 m fjórsundi, 400 m skriðsundi, 800m skriðsundi og/eða 1500 m skriðsundi.
Í flokki pilta og stúlkna (15-17 ára) er reiknaður árangur úr tveimur stigahæstu greinum einstaklingsins.
Piltameistari AMÍ 2020 er Daði Björnsson úr Sundfélagi Hafnarfjarðar, en hann hlaut 1332 stig samtals fyrir 100 m bringusund og 100 m skriðsund.
Stúlknameistari AMÍ 2020 er Kristín Helga Hákonardóttir úr Breiðablik, en hún hlaut 1361 stig samtals fyrir 100 m og 400 m skriðsund
SH sá um undirbúning og framkvæmd mótsins og fékk hrós frá Sundsambandi Íslands fyrir vel heppnað mót.
Myndir frá mótinu
Glæsilegar myndir sem Golli tók má sjá á Facebook síðu Sundsambands Íslands m.a. hér
