Sundmaðurinn Róbert Ísak Jónsson úr Firði/SH vann til silfurverðlauna á alþjóðlega Reykjavíkurmótinu í 200 m fjórsundi og setti tvö ný og glæsileg Íslandsmet. Róbert sem keppir í flokki S14 þroskahamlaðra keppti í opnum flokki á mótinu þar sem ekki var keppt í sérstökum flokkum fatlaðra á RIG.
Róbert varð annar í 200 m fjórsundi en Íslandsmetin setti hann í 400 m fjórsundi og 200 m flugsundi. Í fjórsundinu synti hann á 4,59.70 mínútum og sló þar með Íslandsmet Jóns Margeirs Sverrissonar frá 2013 sem var 5,01.32 mínútur.
Í 200 m flugsundi sló Róbert annað met Jóns 2,42.58 mínútur, sem staðið hafði frá árinu 2010 en tími Róberts Ísaks var 2,26.67 mínútur.
