Árið 2011 tók höfuðborg Íslands upp á því að bjóða íbúum að setja hugmyndir á vef og „kjósa upp“ bestu hugmyndina. Vefurinn var þróaður af einkaframtaki sem er sjálfseignarstofnun. Fleiri bæir hafa tekið upp á þessu, þar á meðal Hafnarfjörður. Þar sem vel hefur tekist til hefur þessi vefur orðið að gagnlegri uppsprettu hugmynda fyrir bæjaryfirvöld, tillögum verið tekið fagnandi, athugasemdum svarað og hugmyndirnar settar í ferli og framkvæmdar.
Á Betri Hafnarfjörður er að finna fjölmargar hugmyndir sem íbúar hafa sett inn sem óvíst er að hafi náð til stjórnenda í bænum, eða í það minnsta fer lítið fyrir svörum fulltrúa bæjarins við hinum ýmsu áhugaverðu tillögum sem íbúar hafa sett fram. Þar er þó hlekkur á vefsíðu Hafnarfjarðar þannig að eitthvað hlutverk hlýtur bærinn að hafa fyrir Betri Hafnarfjörð, því ekki trúum við því að einungis sé um sýndargjörning að ræða.
Píratar í Hafnarfirði leggja áherslu á að Betri Hafnarfjörður þjóni sem raunverulegur samráðsvettvangur. Hugmyndir íbúa þar eru sýnilegar, en þurfa að vera skoðaðar af fulltrúa bæjarins, þær bestu ættu undantekningarlaust að verða að raunveruleika. Píratar vilja tryggja að fulltrúi Hafnarfjarðar eða talsmaður bæjarbúa hafi það hlutverk að sinna þessum fína íbúavef og vinna að framgangi málefna.
Albert Svan Sigurðsson,
frambjóðandi í 3. sæti fyrir Pírata í Hafnarfirði
