Ein af grunnhugsjónum sjálfstæðisstefnunnar er að sem flestir geti eignast sitt eigið húsnæði.
Sem oddviti Sjálfstæðisflokksins í Hafnarfirði í meirihluta í bæjarstjórn frá árinu 2014 hef ég lagt á það mikla áherslu að nægt framboð lóða fyrir íbúðahúsnæði sé fyrir hendi og dylst engum þegar farið er um nýjustu hverfi bæjarins að gríðarleg uppbygging hefur og á sér enn stað. Enda hefur íbúum bæjarins fjölgað hratt á síðastliðnum árum og eru nú um 32.600. Gert er ráð fyrir að íbúarnir verði orðnir um 40.000 eftir fimm ár. Þær staðreyndir tala sínu máli. Hafnarfjarðarbær hefur sinnt skyldu sinni í þessum efnum og sala nýrra íbúða gengið mjög vel.
Þurfum fjölbreyttar íbúðir og nýtt land undir lóðir
Auk uppbyggingar á nýjum svæðum hefur verið byggt á þéttingarreitum og á undanförnum vikum hafa samningar verið undirritaðir við lóðarhafa á hafnarsvæðinu og má því vænta að framkvæmdir fari að hefjast þar. Það er mikilvægt að íbúðaframboð sé fjölbreytt bæði hvað staðsetningu og stærð varðar, til að koma til móts við mismunandi óskir og þarfir.
Lítið lóðaframboð er eitt af því sem hefur þrengt að húsnæðismarkaðnum á höfuðborgarsvæðinu undanfarin misseri.
Víðari vaxtarmörk
Í Hafnarfirði hefur þó verið skilningur fyrir hendi eins og tölurnar sýna. Það þarf að halda áfram að brjóta nýtt land og höfum við bent á það innan svæðisskipulags höfuðborgarsvæðisns að víkka þurfi vaxtarmörk svæðisins. Ekki síst í ljósi þess að spá um íbúafjölgun á svæðinu hefur farið langt fram úr því sem spáð var þegar vaxtarmörkin voru samþykkt fyrir um tíu árum.
Ef ekki næst samkomulag um það innan svæðisskipulagsnefndarinnar verður að breyta lögum þarna um svo einstök sveitarfélög hafi ekki neitunarvald en eins og kunnugt er hefur vinstri meirihlutinn í Reykjavík lýst yfir andstöðu við frekari útþenslu íbúðabyggðar á höfuðborgarsvæðinu.
Lægri verðbólga og vextir
Auk lóða- og íbúðaframboðs hefur vaxtastigið mest áhrif á stöðuna á íbúðamarkaðnum og sjáum við fram á bjartari tíma nú þegar vaxtalækkunarferlið er hafið. Við finnum það ekki síst hjá Hafnarfjarðarbæ í því hve mikil eftirspurn er eftir lóðum um þessar mundir. Jafnvægi á húsnæðismarkaðnum stuðlar að minni verðbólgu og lægri vöxtum. Það er stærsta hagsmunamál okkar allra.
Rósa Guðbjartsdóttir, bæjarstjóri
og skipar 4. sætið á lista Sjálfstæðisflokksins í Suðvesturkjördæmi.
