Meirihluti Bjartrar framtíðar og Sjálfstæðisflokks í bænum hefur nýlega samþykkt einkarekna unglingadeild á grunnskólastigi. Mér er spurn hvort einkarekinn skóli með þessu sniði styrki unglingastigið í Firðinum.
Það eru sjö grunnskólar hér auk grunnstigs Hjallastefnu og nálægt 1.160 nemendum í unglingadeild.
Þegar horft er á hvað skólinn fær nýtt út úr þessu má segja að viðfangsefni námsins sé gott, íþróttir og heilsusamlegur lífsstíll. Það mundi nýtast hverju ungmenni vel. Meirihlutinn hefur samþykkt með einkaskóla að styrkja allt að 45 nemendur í slíkt nám en auk þess þurfa foreldrar að leggja til fé fyrir sín börn.
Hvað þýðir þetta fyrir unglingastigið í heild? Á meðan sett er fé í örfáa nemendur þá eru almennu unglingadeildirnar ekki að fá það fé til að styrkja sínar einingar. Það er spurning hvort það fækki ekki almennu námsvali í hinum unglingadeildunum þegar þessi einkaskóli bætist við því það er ekki hægt að nota sömu krónuna á tveim stöðum samtímis. Þá er ljóst að ekki er hægt að efla námsval allra unglinga í Hafnarfirði. Hugsanlega gerir það valnám á unglingastigi einsleitara? Með ákvörðun meirihlutans munu bæjarbúar styrkja 45 unglinga sem geta greitt inntökugjald fyrir skyldunámið en 1.115 unglingar sitja hjá. Hér er ekki jafnt aðgengi til náms því ekki hafa allar fjölskyldur efni á inntökugjöldum.
Meirihlutinn kveinaði þessi ósköp fyrstu tvö árin sín að hvergi væri peningur og það þyrfti að hagræða og skera niður. Fyrir utan niðurskurð í leikskólaplássum, sem Adda María Jóhannsdóttir, bæjarfulltrúi (S) hefur áður gert góð skil í blaðinu þá birtist hagræðingin líka í því að ekki var hægt að auka við húsnæði í Áslandsskóla en þess í stað fengu unglingar skólans spaldtölvur til að mæta hússnæðisskorti. Hvernig á að mæta þeim nemum nú? Hraunvallaskóli hefur líka glímt við húsnæðisskort síðustu misseri sem bitnar m. a. á unglingunum. Þegar ekki er hægt að mæta aðkallandi húsnæðisvanda sumra grunnskólanna, hvernig er þá hægt að mæta slíku gæluverkefni, sem ég tek fram að hefur gott innihald. Ég hefði viljað sjá nám einkaskólans inn í unglingadeildum grunnskólanna og án aðgangseyris.
Það er vond stefna að börn greiði skólagjöld á grunnskólastigi. Það ýtir undir mismunun nemenda og fjölskyldna þeirra. Eru Hafnfirðingar virkilega sáttir á þeirri vegferð að sumir greiði í einkaskóla fyrir barn á meðan aðrir hafa ekki efni á því og um leið ekki valmöguleikann til náms fyrir sín börn.
Höfundur er varafulltrúi (S) í umhverfis- og framkvæmdaráði.
