Meirihluti Framsóknar- og Sjálfstæðisflokks ákvað á síðasta bæjarstjórnarfundi að hækka gjaldskrá notenda vegna skólamáltíða í grunnskólum um 33% og um 19% í leikskólum. Þetta er mikil og íþyngjandi hækkun fyrir barnafjölskyldur í bænum og kemur harðast niður á þeim sem við kröppustu kjörin búa. Ákvörðunin kemur verulega á óvart enda í fullkomnu ósamræmi við málefnasamning meirihluta Framsóknar- og Sjálfstæðisflokks. Í honum segir nefnilega að stefnt verði að því að halda áfram að lækka álögur á barnafjölskyldur í skólakerfinu m.a. fyrir skólamáltíðir og markviss skref stigin í þá átt að gera þær gjaldfrjálsar. Erfitt er að átta sig á því hvernig 33% hækkun er markvisst skref í þá átt að gera skólamáltíðir gjaldfrjálsar.
Er ekkert að marka málefnasamning meirihluta Framsóknar- og Sjálfstæðisflokks?
Málefnasamningur meirihlutans virtist raunar gleymdur og grafinn hjá bæjarfulltrúum meirihlutaflokkanna á síðasta bæjarstjórnarfundi. Svo rykfallinn var samningurinn að bæjarfulltrúar Framsóknar- og Sjálfstæðisflokks virtust eiginlega telja málefnasamninginn, sem á að heita grundvöllur meirihlutasamstarfsins, þessari ákvörðun með öllu óviðkomandi. Töldu hann ekkert erindi eiga í umræðuna. Eftir stendur þá spurningin; er ekkert að marka málefnasamning meirihluta Framsóknar- og Sjálfstæðisflokks?
Mikilvæg þjónusta sem styður við góðan skólabrag
Engum dylst mikilvægi hollrar næringar fyrir börn og unglinga og nemendur verja stórum hluta af degi sínum innan veggja skólanna. Á skólatíma er því afar mikilvægt að þeir hafi greiðan aðgang að næringarríkum mat. Því er brýnt að standa vörð um þessa mikilvægu þjónustu sem styður við góðan skólabrag.
Forgangsröðun í boði og á ábyrgð meirihlutans
Lausatök ríkisstjórnarinnar á efnahagsmálum valda öllum vandræðum. Þrálát verðbólga og vextir í hæstu hæðum leggjast þyngst á þær fjölskyldur sem búa við bágustu kjörin. Þrátt fyrir augljóst mikilvægi skólamáltíða og erfitt efnahagsumhverfi ákvað meirihluti Framsóknar- og Sjálfstæðisflokks að koma ekki til móts við barnafjölskyldur í Hafnarfirði. Því miður mun ákvörðun Framsóknar- og Sjálfstæðisflokks um að hækka gjaldskrá vegna skólamáltíða um 33% í grunnskólum og 19% í leikskólum leggjast þyngst á þann hóp sem fyrir er í viðkvæmri stöðu. Bæjarfulltrúar Samfylkingarinnar, jafnaðarflokks Íslands, greiddu atkvæði gegn hækkuninni enda styður jafnaðarfólk ekki forgangsröðun af þessum toga. Hún er alfarið í boði, og á ábyrgð, meirihluta Framsóknar- og Sjálfstæðisflokks.
Árni Rúnar Þorvaldsson
bæjarfulltrúi Samfylkingarinnar.
