Hafnarfjarðarbær hefur alla burði til að verða fyrstur bæja til að hanna fjölskyldustefnu sem virkar og búa til fjölskylduvænt samfélag þar sem börn og barnafjölskyldur búa við jöfn tækifæri og öryggi. Um er að ræða fjölskyldustefnu sem tekur mið af börnum, fjölskyldum, er fyrir öll skólastig og fyrir eldri borgara.
Stefnan þarf að taka mið af þörfum fjölskyldunnar á öllum æviskeiðum. Fjölskyldustefna á að vera hjarta, fallegt rautt hjarta sem slær í takti við lifandi hraunið undir okkur og á að byggjast á þörfum fjölskyldna. Í samtölum við fjölskyldur kemur fram nokkur óánægja með stefnuleysi í þeirra málum. Leggja þarf áherslu á að samræma fjölskylduábyrgð og störf. Þjónusta þarf að vera til staðar fyrir yngstu börnin til að foreldrar geti gengið að öruggri daggæslu eftir að fæðingarorlofi lýkur. Skapa þarf forsendur til þess að foreldrar geti til jafns borið ábyrgð á heimilishaldi, umönnun og uppeldi barna. Þjónustan þarf að vera hönnuð til að mæta þörfum fjölskyldunnar.
Fjölskyldur eiga ekki að þurfa að aðlaga sig þörfum kerfisins heldur á kerfið að aðlaga sig að þörfum fjölskyldunnar. Þá þarf stefnan að gefa fjölskyldum rödd sem tekið er mið af og henni sýnd sú virðing og það traust sem hún á skilið. Við eigum að hlúa að fjölskyldunni, því saman getum við búið til enn fallegri, umhyggjusamari og réttlátari Hafnarfjörð sem leggur allt kapp á að vinna fyrir alla bæjarbúa, óháð aldri, kyni og stöðu.
Við hjá Framsókn og óháðum leggjum ríka áherslu á að bæta hag einstaklinga og fjölskyldna í Hafnarfirði ef þau fá þann stuðning sem þau þurfa og tækifæri til þess að vera virkir þátttakendur í samfélaginu þá mun það skila sér margfalt aftur tilbaka út í samfélagið.
Við erum sterkari saman.
Jóhanna Erla Guðjónsdóttir, félagsráðgjafi og skipar 3. sæti á lista Framsóknar og óháðra. Margrét Vala Marteinsdóttir, forstöðukona Reykjadals og skipar 4. sæti á lista Framsóknar og óháðra.
