Nýkviknaður áhugi Sjálfstæðisflokksins í Reykjavík á húsnæðisvandanum hefur vakið athygli á síðustu vikum. Eyþór Arnalds og Vigdís Hauksdóttir hafa farið mikinn í gagnrýni sinni á meirihlutann í Reykjavík vegna meints aðgerðaleysis. Í Hafnarfirði kemur þessi áhugi Sjálfstæðisflokksins fólki nokkuð spánskt fyrir sjónir því áhuga- og getuleysi flokksins í málaflokknum hefur verið algjört síðustu fjögur ár í bænum.
Í þeim bæjarfélögum þar sem Sjálfstæðisflokkurinn fer með stjórn mála hefði honum verið í lófa lagið að finna áhuga sínum á húsnæðismálum farveg. Þar hefur flokkurinn sannarlega haft tækifæri til þess að auka framboð á húsnæði á viðráðanlegum kjörum fyrir almenning. Í bæjarfélögum þar sem Íhaldið hefur ráðið ríkjum áratugum saman – Garðabæ og Seltjarnarnesi – skyldi maður ætla að búið væri að leysa þessi mál til frambúðar. Það má kannski segja að flokkurinn hafi fundið lausn sem honum hentar í þessum bæjarfélögum – að bjóða hreinlega ekki upp á félagslegt húnsæði og treysta á að Reykjavík – og aðrir – leysi vandann.
Reykjavík dregur vagninn
Undir forystu Samfylkingarinnar hefur Reykjavík dregið vagninn í viðbrögðum við húsnæðisvandanum. Allar tölur og staðreyndir vitna um þetta. En önnur sveitarfélög hafa ekki staðið sig að sama skapi. Reykjavík ein getur ekki leyst húsnæðisvandann. Ríkið og önnur sveitarfélög verða líka að koma að málinu. Framlag Sjálfstæðisflokksins í Hafnarfirði til lausnar þessara mála er rýrt. Sjálfstæðismenn í Hafnarfirði hljóta að þakka æðri máttarvöldum það á hverjum degi að Eyþór og Vigdís eru í minnihluta/stjórnarandstöðu í Reykjavík en ekki í Hafnarfirði.
Hafnarfjörður rekur lestina
Undir forystu Sjálfstæðisflokksins rak Hafnarfjörður lestina þegar kom að fjölda íbúða í byggingu meðal sveitarfélaga á höfuðborgarsvæðinu á síðasta ári og eftirtekjan var rýr eftir síðasta kjörtímabil. Samt voru líklega hvergi fleiri tilbúnar lóðir en einmitt í Hafnarfirði við upphaf þess. Í júní sl. skilaði svo húsnæðisfélagið Bjarg, sem er óhagnaðardrifið leigufélag, lóðum undir 32 íbúðir í Skarðshlíð aftur til bæjarins þar sem skilmálarnir voru óaðgengilegir. Enginn aukafundur hefur verið haldinn í bæjarráði um það mál, þó nýverið hafi verið boðað til aukafundar með minnsta mögulega fyrirvara um annars konar húsnæðisvanda.
Verkin tala – miklu fremur en tækifærissinnað málskrúð Eyþórs og Vigdísar í Reykjavík – og þau vitna um raunverulegan áhuga Sjálfstæðisflokksins á félagslegum lausnum á húnæðisvanda. Og seint verða verk Sjálfstæðisforystunnar í Hafnarfirði talin rismikil.
Árni Rúnar Þorvaldsson
fulltrúi Samfylkingarinnar í fjölskylduráði Hafnarfjarðar.
