Nú eru liðnar liðlega sex vikur síðan bæjarfulltrúarnir Valdimar Víðisson og Skarphéðinn Orri Björnsson fullyrtu á vel sóttum kynningarfundi um skipulagsbreytingar vegna Coda Terminal kolefnisförgunarstöðvar í bænum að íbúum verði gefinn kostur á að kjósa um breytingarnar.
Þar með var tekin af allur vafi á íbúakosningu enda verkefnið í heild sinni afar umdeilt í bænum. En síðan þá hefur ekkert heyrst um kosninguna og engin merki þess að hún hafi nokkurs staðar komið til umræðu á vettvangi bæjarstjórnar. Á sama tíma virðist unnið hratt og örugglega með Carbfix að framgangi verkefnisins í Straumsvík.
Hér reynir á biðlund bæjarbúa og eðlilegt að spyrja þá Valdimar og Skarphéðinn: Hvenær verður íbúakosning um skipulagsbreytingar vegna Coda Terminal í Hafnarfirði?
Davíð Arnar Stefánsson
oddviti VG í Hafnarfirði
