Nú er komið að sveitarstjórnarkosningum þar sem við öll getum haft áhrif á það í hvernig bæ við viljum búa.
Stefna Vinstri grænna byggir á jafnrétti, jöfnuði og umhverfisvernd. Við erum kvenfrelsisflokkur sem stefnum að jafnrétti og viljum við útrýma allri kynbundinni mismunun hvar sem hún birtist. # MeToo byltingin hefur sýnt okkur svo ekki verður um villst að það er enn langt í land og mjög brýnt að við bregðumst við af fullri alvöru. Umfang kynbundins ofbeldis og mismununar er augljóslega margfallt meira en nokkurn óraði fyrir.
Umhverfismálin eru orðin meira en aðkallandi því ef ekkert verður að gert bendir allt til þess að við munum ekki geta snúið þróuninni við. Það er ekki lengur spurning um hvenær við tökum okkur á heldur verðum við að bregðast við strax og gera allt sem í okkar valdi stendur til þess að minnka mengun og sóun og breyta lifnaðarháttum okkar.
Við eigum öll rétt á mannsæmandi lífi. Sú staðreynd að á Íslandi séu börn sem alast upp við fátækt er sláandi og óskiljanlegt. Að á Íslandi sé eldra fólk og öryrkjar sem eigi erfitt með að láta enda ná saman vegna lágra örorkubóta og ellilífeyris er skammarlegt.
Þessu viljum við breyta!
Vinstri græn í Hafnarfirði vinna fyrir ykkur kæru Hafnfirðingar. Við stöndum vörð um jöfnuð, jafnrétti og umhverfisvernd. Við teljum að allir geti átt mannsæmandi líf og geti alist upp í samfélagi án kynbundins ofbeldis og að afkomendur okkar taki ekki við sviðinni jörð eftir okkur sem erum hér núna.
Elva Dögg Ásudóttir Kristinsdóttir
bæjarfulltrúi Vinstri grænna og skipar 1. sæti á lista Vinstri grænna.
