Í orði eru flestir sammála um mikilvægi þess að samfélagið styðji við bakið á barnafjölskyldum. Það rímar hins vegar illa við meginstefið í stefnu Sjálfstæðisflokksins, sem styður helst við bakið á þeim sem minnst þurfa á því að halda. Á landsvísu birtist sú stefna m.a. í því að barnabætur lækka og skattar eru lækkaðir á þá efnamestu. Hafnfirskar barnafjölskyldur fara heldur ekki varhluta af þessari stefnu Sjálfstæðisflokksins.
Hafnarfjörður dýrastur á höfuðborgarsvæðinu
Samkvæmt samantekt fjármálasviðs Reykjavíkurborgar á gjaldskrám sveitarfélaga er Hafnarfjörður dýrasta sveitarfélagið á höfuðborgarsvæðinu fyrir barnafjölskyldur. Í stuttu máli má segja að í öllum þeim sex tilvikum sem fjármálaskrifstofan skoðar er Hafnarfjörður dýrastur nema í tveimur tilvikum þar sem gjöldin eru næsthæst. Það má því með sanni segja að samanburðurinn komi ekki vel út fyrir Hafnarfjörð og þann meirihluta sem nú stýrir málum. En verst er þetta að sjálfsögðu fyrir barnafjölskyldur í bænum sem þurfa að súpa seyðið af þessari stefnu.
Bein afleiðing af stefnu Sjálfstæðisflokksins
Það ástand sem samantektin leiðir í ljós er bein afleiðing af þeirri stefnu Sjálfstæðisflokksins að leggja áherslu á að lækka álögur helst á það fólk sem minnst þarf á því að halda, sbr. smávægilegar lækkanir á útsvari sem skila sér mun betur til tekjuhárra en þeirra sem hafa lægri tekjur. Björt framtíð hefur í meirihlutasamstarfinu hér í Hafnarfirði lagt blessun sína yfir þessa stefnu og þróun. Það er mikilvægt að víkja af þessari leið og gera Hafnarfjörð aftur að eftirsóknarverðum bæ fyrir barnafjölskyldur. Hafnfirskar barnafjölskyldur eiga einfaldlega betra skilið.
Í kosningum í vor hafa kjósendur tækifæri til þess að snúa af þessari vegferð með því að kjósa til áhrifa flokka sem hafa hag barnafjölskyldna að leiðarljósi. Samfylkingin leggur í öllum sínum störfum áherslu á að bæta hag barnafjölskyldna með því að tryggja þeim viðeigandi þjónustu og lækka álögur á þær eins og mögulegt er.
Árni Rúnar Þorvaldsson, fulltrúi Samfylkingarinnar í fjölskylduráði
