Í ágúst 2018 vakti fjölskylduráð athygli á þeirri alvarlegu stöðu sem uppi er í dagdvalarmálum fyrir fólk með heilabilunarsjúkdóma. Á þessum tíma voru um 30 manns á biðlista eftir dagdvöl í Drafnarhúsi og biðtími eftir plássi var langur. Fjölmiðlar tóku upp bókun fjölskylduráðs og var fjallað um stöðuna í málefnum fólks með heilabilunarsjúkdóma út um allt land. Stjórnmálamenn, aðstandendur og fagfólk tók þátt í umræðunni, hvort sem var í viðtalsþáttum í ljósvakamiðlum, viðtölum í blöðum eða með aðsendum greinum. Það var því von okkar að eitthvað færi að gerast í þessum málum.
Hér í Hafnarfirði ákvað fjölskylduráð að stofna starfshóp sem hafði það eina verkefni að finna húsnæði sem væri hentugt fyrir dagdvöl. Niðurstaða starfshópsins var sú að Hafnarfjarðarbær tæki á leigu hluta af Drafnarhúsi. Í því húsi er nú þegar rekin dagdvöl og er rými fyrir 22 einstaklinga. Viðbótarrýmið sem áætlað var að taka á leigu væri þá fyrir 10-12 einstaklinga til viðbótar og mundi það stytta biðlista eftir plássi í Drafnarhúsi.
Vert er að taka fram að sveitarfélögum ber ekki skylda til að útvega húsnæði fyrir slík úrræði en Hafnarfjarðarbær ákvað samt sem áður að fara í þá vinnu, þar sem vandinn er mikill.
Í lok árs 2018 var biðlisti eftir rými í Drafnarhúsinu ekki eins langur og hann var í sumar. Núna eru um 20 á biðlista í svokölluðum forgangi 1. Það eru samt alltof margir.
Í nóvember var sent bréf á heilbrigðisráðuneytið og óskað eftir fjármagni til reksturs þessara dagdvalarrýma. Í desember kom svar frá ráðuneytinu og það var einfalt. Erindinu var hafnað þar sem ekki var gert ráð fyrir þessu í fjárlögum. Við sendum annað bréf í janúar 2019 og fengum sama svar, erindinu var hafnað.
Núna í febrúar 2019 verður enn og aftur sent bréf þar sem óskað verður eftir að forgangsröðun ráðuneytisins verður endurskoðuð. Biðlistar eftir dagdvalarrýmum fyrir fólk með heilabilunarsjúkdóma hafa ekki bara áhrif á þá einstaklinga sem eru á biðlistum, þeir hafa einnig mikil áhrif á nánustu aðstandendur, fjölskyldu og vini.
Ég vona að heilbrigðisráðuneytið endurskoði ákvörðun sína og leggi fjármagn í þetta verkefni.
Valdimar Víðisson
formaður fjölskylduráðs Hafnarfjarðarbæjar
Greinin birtist í Fjarðarfréttum, fréttablaði Hafnfirðinga, 21. febrúar 2019.
