Vel Nærð, vel lærð

Næring er lykilþáttur í vellíðan og heilsu barna. Vel nærðum nemendum og starfsmönnum líður betur. Það eiga allir auðveldara með að einbeita sér þegar þeir hafa nærst vel. Þegar það er í boði áhugaverður, góður og vel framsettur matur sem öllum langar í, þá hefur það áhrif á lærdómsgetu og hegðun nem­enda. Við þekkjum það öll hvernig okkur fer að líða þeg­ar við erum svöng eða höfum ekki fengið fylli okkar af næringu.

Við hjá Viðreisn telj­um að það sé hægt að bæta vellíðan nemenda í grunn- og leikskólum Hafnarfjarðar með fjöl­breytt­ari og góðu vali skólamáltíða. Við höfum ítrekað óskað eftir því við vinnu fjárhagsáætlunar Hafnarfjarðar að sett verði fjármagn til að finna fjölbreyttari leiðir við val á skóla­mál­tíðum.

Nú hefur það loksins verið samþykkt í fræðsluráði Hafnarfjarðar. Þessi bar­átta okkar, um að farið verði í metnað­arfulla vinnu með það að markmiði að hrinda af stað jákvæðri þróun í skóla­máltíðum bæjarins þar sem ferskleiki og fjölbreytni verður okkar leiðarljós. Við teljum að skólum eigi að gefast kostur á að nýta sér fjölbreyttar leiðir þegar kemur að skólamáltíðum og fleiri þjónustuaðilar eiga að geta tekið þátt í að veita þjón­ustuna.

Með fjölbreyttum leiðum eigum við m.a. við:

• að endurvekja framleiðslu­eldhús /mötuneyti í þeim skól­­um sem hafa rými til þess og áhuga
• að skólar geti farið í sam­starf með framleiðslu á mat.
• að kannaður sé áhugi á upp­setningu framleiðslu­eld­húss innan bæjamarka sem geti þjónustað þá skóla sem eftir því sækjast. Slíkt gæti mögulega þjónustað fleiri stofnanir bæjarins.
• að fleiri og fjölbreyttari fyrirtæki geti þjónustað Hafnarfjarðarbæ með skólamáltíðir.
  Teljum við mikilvægt að leitað verði til nemenda, kennara, foreldra, starfs­menn skólanna og skólastjórnenda til umsagnar.

Hvað sem verður fyrir valinu þá teljum við að valið eigi að vera í hönd­um þeirra sem nýta sér þjónustuna. Megin þráður og markmið þessa verkefnis sé að auka fjölbreytni í fæðuvali og tryggja næringarríkt og hæfilegt magn fyrir alla.

Karólína Helga Símonardóttir,
fulltrúi Viðreisnar í fræðsluráði Hafnarfjarðar.

Ummæli

Ummæli