Umhverfis- og framkvæmdaráð hefur falið embættismönnum bæjarins að taka til skoðunar hvort það sé tímabært að fjölga öryggismyndavélum í landi Hafnarfjarðar. Meginmarkmið með fjölgun öryggismyndavéla er tvíþætt; annars vegar að auka öryggi íbúa og hinsvegar að vernda eignir og umhverfi bæjarins.
Taka skal til skoðunar hvort fjölga eigi svæðum og stofnunum þar sem rafræn vöktun er viðhöfð og hefja umræðu um gildi þess fyrir bæjarbúa. Í fyrsta lagi þarf að skoða hvort og hvaða svæði og stofnanir eiga að sæta vöktun. Í öðru lagi þarf að skilgreina markmið með vöktun og síðan þarf að setja skýrar reglur um notkun í samræmi við lög og reglur sem Persónuvernd hefur sett en um notkun rafrænnar vöktunar, gilda reglur nr. 837/2006, sem Persónuvernd hefur sett með stoð í 5. mgr. 37. gr. laga nr. 77/2000. Þar segir m.a. í 4. gr. að rafræn vöktun verði að fara fram í yfirlýstum, skýrum og málefnalegum tilgangi, s.s. í þágu öryggis eða eignavörslu.
Samkvæmt 5. gr. reglnanna skal þess jafnframt gætt við alla rafræna vöktun að ganga ekki lengra en brýna nauðsyn ber til miðað við þann tilgang sem að er stefnt. Þar segir einnig að gæta skuli þess að virða einkalífsrétt þeirra sem sæta vöktun og forðast alla óþarfa íhlutun í einkalíf þeirra.
Samkvæmt ákvæði 10. gr. reglnanna skal ábyrgðaraðili rafrænnar vöktunar, t.d. sveitarfélag, veita þeim fræðslu sem henni sæta með sannanlegum hætti. Um efni slíkrar fræðslu, eftir atvikum reglna, er einnig fjallað í ákvæðinu og þarf það að taka til tilgangs vöktunarinnar, hverjir hafi eða kunni að fá aðgang að upplýsingum sem safnast og hversu lengi þær verði varðveittar og hvaða búnaður er notaður.
Á síðasta fundi ráðsins var lagt fram yfirlit yfir öryggismyndavélar við stofnanir bæjarins og þar kemur fram að grunn- og leikskólar hafa slík kerfi, sundlaugar hafa öryggiskerfi á blautsvæðum og nokkrar stofnanir að auki. Komin er tími á að yfirfara og endurnýja þessi kerfi og vinna er hafin við kostnaðarmat.
Höfundur er bæjarfulltrúi og formaður umhverfis- og framkvæmdaráðs.
