Börnin mín og þeirra vinir hafa spurt mig hvernig þau geta farið í eigin húsnæði og þau spyrja líka hvað stjórnmálafólk vilji gera í því. Ég hef svarað því að Vinstri græn hafi stefnu um lausnir, og ef þau séu sammála þeim lausnum, þá þurfi þau að merkja x við V og kjósa Vinstri græn í kosningunum að viku liðinni.
Vinstri græn í Hafnarfirði hafa það á stefnuskrá sinni að Hafnarfjarðarbær beiti sér í húsnæðismálum. Ég velti því fyrir mér hvernig mín börn, þegar þau vilja flytja að heiman, geti komið undir sig fótunum í eigin húsnæði. Eigin húsnæði þýðir samt fyrst og fremst húsnæði sem þau ráða yfir sjálf. Til þess að það gerist eru ýmsar leiðir færar, en aðallega er hægt að tala um að leigja eða eiga.
Sama hvort mínir afkomendur vilji eiga eða leigja getur bærinn komið til móts við þarfir þeirra. Bærinn getur komið að stofnun húsnæðisleigufélags til þess að leigja á sanngjörnu verði. Það er lausn fyrir ungt fólk.
Bærinn getur líka úthlutað lóðum til byggingar fjölbýlishúsa sem henta mínum afkomendum sem fyrsta eign. Þá verða til litlar íbúðir sem henta þeim sem eru að byrja að búa. Það er lausn fyrir ungt fólk.
Auk þess getur bærinn haft frumkvæði að því að hefja viðræður við ríkisvaldið um úrræði til þess að ungu fólki verði gert kleift að kaupa fasteign. Hafnarfjarðarbær kemur þannig fram fyrir hönd sinna íbúa svo þeir geti keypt sína fyrstu eign. Það er lausn fyrir ungt fólk.
Ég held að það megi með sanni segja, að ungt fólk sem vill komast í eigið húsnæði verji atkvæði sínu vel með því að kjósa Vinstri græn. Ef þau vilja fara í eigið húsnæði og að stjórnmálafólk geri sitt í þeim málum. Þau merkja x við V. Það er lausn fyrir ungt fólk.
Gestur Svavarsson
skipar 21. sæti á lista VG.
